Deputeti i grupit parlamentar të Lëvizjes Vetëvendosje, nga radhët e Listës Guxo, Burim Meta, ka thënë se Doarsa Kica-Xhelili ka qenë anëtarja më e privilegjuar e kësaj liste.
Sipas tij, është vetë Kica-Xhelili ajo që ka humbur nga dalja e saj nga Lista Guxo.
Tutje, ai ka thënë se ajo asnjëherë nuk ka pasur ndonjë kërkesë që nuk i është plotësuar.
“Grupi parlamentar i LVV-së, natyrisht do ta kenë një deputet më pak, por të humbë përveç Doarsa Kicës, nuk shoh që ka humbur Partia Guxo. Është interesante të thuhet se Doarsa asnjëherë në mbledhjet e mbajtura nuk ka pasur ndonjë pakënaqësi, nuk ka pasur ndonjë kërkesë që nuk i është plotësuar”, ka thënë Meta.
Meta është shprehur se deputetja Kica-Xhelili e kishte konfirmuar se përkundër disa pakënaqësive nuk do të dilte nga grupi parlamentar i Lëvizjes Vetëvendosje.
“Tek para disa ditësh, ka dalë nga grupi i koordinatorëve që janë marrë me konstituimin e partisë. Kam lexuar një shkrim në atë grup e cila ka qëndruar ende në atë grup, deklarata e saj ka qenë se unë do të qëndroj brenda grupit parlamentar”, ka thënë ai.
Deputeti Meta i ka mohuar pretendimet e ish-koordinatorit të Listës Guxo, Balton Dërguti, i cili ka thënë se ai ka pranuar të dalë në LDK me kusht që të jetë kryetar i degës së saj në Ferizaj.