Ministri i Financave, Hekuran Murati, ka thënë se në mbledhjen e 112-të të Qeverisë së Kosovës janë ndarë 5.4 milionë euro për subvencionimin e tarifave të energjisë elektrike.
Murati në një konferencë për media pas mbledhjes së qeverisë ka theksuar se subvencionimi i tarifave po bëhet në mënyrë që ato të mos rriten në mënyrë të pakontrollueshme.
“5,4 milionë euro në mënyrë që të mbulohet subvencionimi i deritanishëm sipas modaliteteve nga Ministria e Ekonomisë”, ka thënë ministri i Financave, Hekuran Murati.
Ndër të tjera, ai ka bërë të ditur se ka miratuar ndarjen buxhetore në kuadër të Pakos së Përballjes me Inflacionin për ata që nuk i kanë marrë ende shtesat, kështu duke ndarë 5.8 milionë euro si mbështetje.
Sipas qeverisë, një pjesë e këtyre mjeteve do të shkojnë për studentët që nuk kanë marrë shumën prej 100 eurosh.
Ndërsa, pjesa tjetër është shtesa për punëtorët e ndërmarrjeve publike dhe po ashtu subvencionimin e pagesave për kursimin e energjisë elektrike.
“Bëhet fjalë për masat qoftë për mbështetjen e sektorit publik dhe studentëve që nuk kanë marrë shtesat”, ka vijuar ai.