Ministria e Kulturës, Rinisë dhe Sportit (MKRS) ka reaguar ndaj përpjekjeve të Serbisë që përmes filmit “Harvest” të njollosë luftën e Ushtrisë Çlirimtare të Kosovës.
MKRS thotë se politika serbe po ndërton narracion të urrejtjes ndëretnike dhe po vazhdon me nxitje të konfliktit përmes filmit e instrumenteve të tjera të kulturës, të cilat në kushte normale do të duhej të ishin në funksion të demokracisë e bashkëjetesës.
“Bazuar në raportimet e mediave serbe, kanë filluar xhirimet e filmit “Harvest” i mbështetur financiarisht nga shteti serb e i cili lidhet me “Shtëpinë e Verdhë” në Shqipëri ku serbët pretendojnë që është kryer trafikim organesh nga Ushtria Çlirimtare e Kosovës, pretendime fiktive dhe shpifje që nuk u vërtetuan asnjëherë nga autoritetet ndërkombëtare” – thuhet në njoftimin e MKRS në Facebook.
Ky nuk është filmi i parë me propagandë i Serbisë.
Ngjashëm ishte realizuar edhe filmi dokumentar me metrazh të gjatë “Shtëpia e Verdhë” i autores Slagjana Zariq.
MKRS thotë se tentativat e tyre të vazhdueshme për të deformuar realitetin, si në rastin e filmit “Harvest”, duhet të alarmojnë autoritetet relevante dhe bashkësinë ndërkombëtare.
Sipas MKRS -së, është e trishtë dhe e papranueshme që një mjet kulturor si filmi po keqpërdoret për të shpërndarë propagandë, por, sipas saj, përtej tentativave për të rishkruar historinë përmes kinematografisë, e vërteta triumfon gjithmonë në sfidë me propagandën.