Ministrja e Arsimit, Arbërie Nagavci, të enjten i ka njoftuar prindërit se ata mund të aplikojnë për subvencionimin e teksteve shkollore duke filluar nga nesër.
Siç ka bërë të ditur ajo nëpërmjet një videoje në rrjetin social, Facebook, kjo është një masë për të ndihmuar familjet me koston e lëndëve mësimore për fëmijët e tyre.
Sipas saj, mjetet për subvencionim do të transferohen në xhirollogaritë e prindërve nga fillimi i javës së ardhshme.
Për nxënësit nga klasa 1 deri në klasën e 5, do të ndahen 80 euro për të blerë tekste dhe materiale mësimore.
“Nga nesër mund të aplikoni për subvencionimin e teksteve shkollore. Mjetet do të dalin në xhirollogaritë tuaja që nga fillimi i javës së ardhshme. Do të ndahen 80 euro për nxënësit nga klasa 1 deri në klasën e 5 për blerjen e teksteve dhe materialeve mësimore”, ka thënë Nagavci.
Një hap tjetër i ri sipas ministres Nagavci është se edhe për nxënësit nga klasa 6 deri në klasën e 9, të cilët tashmë i kanë të siguruara tekstet mësimore, do të ndahen 30 euro si mbështetje për materiale të tjera shkollore.
Ajo ka njoftuar se platforma e aplikimit dhe instruksionet për aplikim do të publikohen nesër.
Lista e teksteve të përzgjedhura nga profesionistët e fushës tashmë është e gatshme në shtëpitë botuese, ndaj prindërit ftohen të konsultohen me mësimdhënësit e tyre për të zgjedhur tekstit e duhur.
Kujtojmë se dhjetë ditë para nisjes së procesit mësimor, Ministria e Arsimit, kishte njoftuar se ka dështuar të arrijë marrëveshje me shtëpitë botuese për blerjen e librave, teksa i akuzoi ato që ofertuan çmime më të larta sesa ato që i kanë vendosur në libraritë e tyre.