Me 65 vota për është miratuar zgjatja e masave emergjente për furnizim me energji elektrike edhe për 30 ditë në seancën e 8 nëntorit në Kuvendin e Kosovës.
Ministrja e Ekonomisë, Artane Rizvanolli kishte kërkuar nga Qeveria e Kosovës dhe deputetët që të votohet vazhdimi i masave emergjente për furnizim me energji elektrike edhe për 30 ditë.
Për këtë vendim u zhvillua seancë e jashtëzakonshme.
Rizvanolli ka thënë se krahasuar me vitin e kaluar në këtë vit “ka ulje të konsumit të energjisë elektrike për 6%” për të cilin ka theksuar se është trend pozitiv për tejkalim të krizës energjetike sidomos gjatë periudhës së dimrit.
Ajo ka përmendur edhe skemat e Qeverisë për mbështetjen e qytetarëve për tejkalimin e kësaj krize si thirrjen për subvencionim të efiçiencës së energjisë për qytetarët, për të cilën ka thënë se do të hapet aplikimi sërish të mërkurën si shkak i procedurave teknike për të cilat janë ankuar qytetarët.
“Në funksion të mbështetjes së qytetarëve, Qeveria e Kosovës ka marrë disa vendime, 6 milionë euro për tejkalimin e krizës energjetike, është bërë publike thirrja për subvencionim të efiçiencës së energjisë për qytetarët, për të cilën do të hapet aplikimi sërish”, ka deklaruar ajo.
Ndryshe, të martën e një nëntorit, Komisioni për Ekonomi, Industri, Ndërmarrësi dhe Tregti ka miratuar vazhdimin e masave emergjente për furnizim me energji për 30 ditët e ardhshme, për shkak të krizës energjetike që ka kapluar vendin.
Po ashtu në këtë seancë me 64 vota për është votuar edhe projektligji për masat e përkohshme të produkteve bazë në raste të destabilizimit të tregut.
Rizvanolli kërkon vazhdimin e masave emergjente për furnizim me energji