Presidenti serb, Aleksandër Vuçiq, ka akuzuar Kosovën dhe bashkësinë ndërkombëtare, kinse po duan “poshtërimin e Serbisë”.
Sipas logjikës së tij dhe me “mizën mbas veshi”, qëllimi i palës kosovare është që ta paraqes kryeministrin Albin Kurti si presidentin ukrainas Volodymyr Zelensky, ndërsa vetë atë si Vladimir Putinin.
Vuçiq theksoi se “për fatin e keq” të Serbisë, Kosova e ka mbrojtjen dhe mbështetjen e faktorit ndërkombëtarë dhe kjo nuk do të ndryshojë, pasi sipas botëkuptimit të tij, Kosova është “fëmija” i tyre.
“(Shqiptarët) ata duan që Serinë ta shtyjnë në konflikt. Ata duan që Serbia të hyjë në konflikt me NATO-n. Ata i dinë që nuk është konflikt me ta. Duan që Serbinë ta shtyjnë në konflikt me NATO-n, ai (Kurti) të shtiret si një lloj Zelensky, që unë të jem një lloj Putin-i dhe kështu me radhë, dhe kjo është ajo që ata po tentojnë, kjo që po bëjnë gjatë gjithë kësaj kohe. Për fat të keq për këtë, ata padyshim kanë mbrojtjen dhe mbështetjen e një pjese të konsiderueshme të komunitetit ndërkombëtar dhe kjo nuk do të ndryshojë sepse është ‘fëmija’ i tyre”, ka thënë Vuçiq në një konferencë për media.