Në orën 03:00 të mëngjesit të së hënës ka ndodhur një aksident ku një veturë ka rënë nga rrethrrotullimi në lagjen e kryeqytetit në “Lakrishtë”.
Për RTV Dukagjinin, zëdhënësja e Policisë së Kosovës për rajonin e Prishtinës, Flora Ahmeti, ka konfirmuar se në këtë aksident janë lënduar tre persona, dhe të njëjtit janë dërguar për trajtim në Qendrën e Klinikës Universitare të Kosovës (QKUK).
Nazmi Kolgeci, drejtor i Klinikës së Kirurgjisë Torakale, tregon se dy të lënduarit janë vëlla e motër dhe se janë në gjendje të mirë shëndetësore.
Kolgeci tregon se të lënduarit kanë marrë trajtimin e nevojshëm dhe nga Emergjenca janë transferuar në Klinikë për të vazhduar me ekzaminimet e nevojshme.
“Në orët e hershme të mëngjesit kemi pranuar dy pacientë, është Albin dhe Yllka Rexha. Lëndimet janë të toraksit me kontuzion torakal dhe hemoteraks minimal. Gjendja momentalisht është e mirë”, ka thënë Kolgeci.