Ministria e Punëve të Brendshme ka njoftuar të gjithë qytetarët se referuar situatës së krijuar me vonesat e pajisjeve me dokumente personale, kryesisht mungesën e pasaportave, Agjencioni për Regjistrimin Civil në kuadër të Ministrisë së Punëve të Brendshme është duke i menaxhuar me kujdes të shtuar sasitë në dispozicion.
MPB-ja ka shtuar se kjo po bëhet përmes analizimit të rasteve të arsyetuara dhe dëshmuara me dokumentacion mbështetës duke i trajtuar si prioritet të lartë kategoritë shëndetësore, studentët, mërgatën dhe përfaqësimin shtetëror.
Tutje, Ministria e Punëve të Brendshme ka thënë se mungesa e lëndës për prodhim të dokumenteve nuk është e pranishme vetëm në Kosovë, por edhe në shtete të tjera, gjersa ka theksuar se po ndodh për shkak të invazionit Rusi-Ukrainë.
“Momentalisht po përballemi me mungesë të lëndës së parë të prodhimit të dokumenteve si shkak i invazionit të Rusisë ndaj Ukrainës, porse me këtë problem nuk po përballet vetëm Republika e Kosovës, por të gjitha shtetet që janë furnizuar në linjën dhe vendin e njëjtë me lëndën bazë të prodhimit të dokumentit”, thuhet në njoftimin e MPB-së.
Ndër të tjera, Ministria e Punëve të Brendshme ka bërë të ditur se po përpiqet të sigurojë materialin e nevojshëm për prodhim dhe furnizim me dokumente. Dhe ka kërkuar mirëkuptimin e qytetarëve për këtë çështje.
“Duam të sigurojmë të gjithë qytetarët e Republikës së Kosovës se po bëjmë përpjekje maksimale që të sigurojmë materialin e nevojshëm, duke mundësuar kështu prodhimin dhe furnizimin me dokumente personale brenda afateve dhe pa vonesa, andaj kërkojmë mirëkuptimin e qytetarëve rreth situatës së krijuar. Ministria e Punëve të Brendshme do të njoftojë opinionin publik sapo të furnizohemi me sasinë e mjaftueshme të materialit bazë për personalizim të dokumenteve”, thuhet në njoftimin e Ministrisë së Punëve të Brendshme.