Ministria e Shëndetësisë (MSh) dhe Instituti Kombëtar i Shëndetësisë Publike (IKSHPK), të enjten e 22 dhjetorit do të nisin një aktivitet një mujor për promovimin e vaksinimit kundër gripit sezonal dhe COVID-19 dhe me qëllim që të rritet numri i të vaksinuarve kundër këtyre dy sëmundjeve.
“Ky është një aktivitet shtesë një mujor me qëllim të promovimit të vaksinimit kundër Gripit sezonal dhe kundër COVID-19 dhe rritjes së numrit të vaksinuarve kundër këtyre dy sëmundjeve. Tashmë, qytetarët e Kosovës mund ta vaksinohen kundër COVID-19 edhe me dozat bivalente përforcuese”, ka shkruar Ministria e Shëndetësisë në njoftim.
Aktiviteti quhet “Karvani i vaksinimit”, që mbështetet nga Organizata Botërore e Shëndetësisë, synon të ndihmojë qytetarët për të kuptuar rëndësinë e vaksinimit dhe për t’u vaksinuar kundër gripit sezonal dhe Covid-19.
“Ky aktivitet synon që të ndihmojë qytetarët për ta kuptuar sa më mirë rëndësinë e vaksinimit dhe njëkohësisht për t’u vaksinuar kundër Gripit sezonal dhe kundër COVID-19, në kohën kur në vende të ndryshme të botës numri i rasteve të reja të COVID-19 ka filluar të rritet.Për këtë qëllim, për një periudhë kohore prej më shumë se një muaji, në komunat e Kosovës, ekipet e vaksinimit do t’u mundësojnë qytetarëve që të vaksinohen përmes këtij aktiviteti”, thuhet në njoftimin e MSh-së.
Tutje, sipas këtij njoftimi objektivat e aktivitetit janë inkurajimi i qytetarëve për vaksinimit kundër COVID-19 dhe kundër Gripit sezonal dhe promovimi i sjelljeve parandaluese dhe masave të shëndetit publik, sigurimi që vaksinimi kundër Gripit sezonal dhe COVID-19 të jetë lehtësisht i arritshëm në komunitetet lokale, veçanërisht për popullatën me të ndjeshme dhe promovimi i pjesëmarrjes së drejtuesve të komunitetit në aktivitetet lokale për të adresuar pengesat në procesin e vaksinimit.
Ndër të tjera, Ministria e Shëndetësisë ka bërë të ditur se qytetarët gjatë karvanit mund edhe të vaksinohen me dozat bivalente përforcuese kundër COVID-19.
“Gjatë karvanit të vaksinimit, përveç vaksinës kundër Gripit sezonal, qytetarët do të mund të vaksinohen edhe me dozat bivalente përforcuese kundër COVID-19, të siguruara nga Ministria e Shëndetësisë”, thuhet në njoftim.
Sipas Ministrisë së Shëndetësisë , aktiviteti do të nisë nesër (të enjten e 22 dhjetorit) në Komunën e Fushë-Kosovës dhe do të mbyllet më 2 shkurt të vitit që vjen në Prishtinë.
