“Kryeministri na thurr vargje vajtimi që nuk i takojnë një kryeministri, kryeministri është për të marrë vendime, nuk është për të vuajtur…është jashtëzakonisht shqetësuese sesi e ndërlidh pastaj.. dy shqiptarë më pak do të jenë duke menduar armiqët tanë. Edhe në këtë tragjedi, përpiqet të marrë poena politikë dhe mundohet ta mbështjellë me një folklorizëm, me njëfarë nacionalizmi të shpifur që e ka si specialitet me vite me radhë”.
Kështu ka deklaruar Imer Mushkolaj për reagimin e Kryeministrit të Kosovës, Albin Kurti, për vrasjen e 35-vjeçares shtatzënë në oborrin e QKUK-së, temë e cila krahas mediave të Kosovës, zë vend edhe me detaje dhe lidhje direkte në studion e “Debat Plus” të RTV Dukagjini.
“Dy qytetarë të Kosovës më pak, dy shqiptarë më pak, do të jenë duke menduar armiqtë tanë”, kishte deklaruar Kurti pak minuta më parë.
Mushkolaj cilëson se kryeministri Kurti nuk ka për prioritet të tijin sektorin e shëndetësisë në Kosovë, gjersa numëron raste të neglizhencës së tij në këtë drejtim.
“Po na flet kryeministri që prej 6 nëntorit kur ka dhënë dorëheqje Rifat Latifi, nuk e ka caktuar ministrin e Shëndetësisë. Po na flet kryeministri i cili po brengoset për gjendjen në shëndetësi dhe QKUK e mediat çdo ditë të lume raportojnë raste të pacientëve që vuajnë në këto institucione”, ka deklaruar Mushkolaj.
Gruaja shtatzënë, e cila ka humbur jetën, është qëlluar me armë zjarri nga një person, i cili dyshohet se është burri i saj. Kështu ka bërë të ditur një anëtar i stafit të QKUK-së për Radio Dukagjini.
Jetën e kanë humbur edhe gruaja edhe fëmija, dyshohet se vdekja e tyre ka qenë e menjëhershme.