Analisti politik, Imer Mushkolaj, lidhur me organizimin e darkës së njohur si “Darka e Lamës” për Policinë e Kosovës, ka thënë se ky organizim është i pavlefshëm dhe se duhet të fokusohemi në çështje më të rëndësishme në mënyrë që atyre t’u ofrohen kushte më të mira.
Mushkolaj ka theksuar se pjesëtarët e Policisë kanë nevojë për paga të dinjitetshme, shtesa për rrezikshmërinë e punës, si dhe sigurimi i duhur jetësor dhe shëndetësor.
“Policia nuk ka nevojë për simbolika koti, si Darka e Lamës. Ka nevojë për pagë të dinjitetshme, shtesa të rrezikshmërisë dhe sigurim jetësor e shëndetësor”, ka shkruar në rrjetin social, Facebook, Mushkolaj.
Kritika e Mushkolajt vjen pas lajmit ku disa pjesëtarë të Njësisë Speciale Intervenuese (NJSI) të Policisë së Kosovës refuzuan të marrin pjesë në këtë darkë.
Ky refuzim nga ana e tyre sipas burimeve të Dukagjinit erdhi për shkak të mosplotësimit të kërkesave të tyre për pagesën e rrezikshmërisë.
Por një gjë e tillë është mohuar nga Zyra e Presidentes së Kosovës.
Në një përgjigje për Dukagjinin ata kanë thënë se “Presidentja ka darkuar me gjysmën e tyre, kurse pjesës tjetër, e cila ka qenë në ndërrim, u është dërgu ushqimi në vendin e punës”.
Tutje në përgjigje thuhet se ata “Kanë qenë. Aktiviteti i është dediku policëve të rënë në detyrë. Prezentë kanë qenë familjet e të gjithë policëve të rënë në detyrë dhe qindra policë nga disa njësite”.
NJSI është njësia qe korri sukses të jashtëzakonshëm në aksionin e tyre në Banjskë të Zveçanit.