Ministrja e Punëve të Jashtme dhe Diasporës, Donika Gërvalla, gjatë urimit të saj për Ditën e Çlirimit të Kosovës, ka falënderuar ushtarët e NATO-s, mirëpo nuk ka përmendur pjestarët e Ushtrisë Çlirimtare të Kosovës.
Postimi i Gërvallës në Facebook ka nxitur reagime të shumta në rrjetet sociale, e në mesin e tyre edhe atë të deputetes së PDK-së, Ariana Musliu-Shoshi.
Musliu-Shoshi ka thënë se është e dhimbshme sesi një ministre e jashtme uron popullin shqiptar për Ditën e Çlirimit, e nuk falënderon gjakun e dëshmorëve të UÇK-së.
“Nën petkun e zëvendëskryeministres dhe ministres së jashtme të Kosovës është e dhimbshme dhe e çuditshme të urosh popullin shqiptar për ditën e çlirimit pa falënderuar gjakun e dëshmorëve të UÇK-së e pa e çmuar jetën e sakrificën e atyre pjesëtareve që janë gjallë e liderëve të UÇK-së në luftë e paqe që sot padrejtësisht janë në Hagë”, ka shkruar Musliu-Shoshi.
Ndër të tjera, deputetja Musliu-Shoshi ka shtuar se si mund të pritet mbrojtja e drejtë e luftës së UÇK-së nga një qëndrim i tillë qeverisës.
“Është fatkeqësi që me qëndrim të tillë të qeverisë presim mbrojtjen e drejtë të luftës së UÇK-së, dënimin e Serbisë për gjenocidin në Kosovë, e trajtimin me dinjitet të veteranëve”, ka shkruar Musliu-Shoshi.
Gërvalla për Ditën e Çlirimit: Fitimtarë jemi gjithmonë atëherë kur jemi të bashkuar