“Kemi arritur në pikën ku marrëdhëniet tona janë acaruar me shtetet aleate mike, ata tashmë nuk janë vetëm të dëshpëruar, por janë edhe të acaruar”.
Kështu ka thënë deputetja e Partisë Demokratike të Kosovës (PDK), Ariana Musliu – Shoshi, lidhur me marrëdhëniet e Kosovës me shtetet mike.
Deputetja është shprehur se prej dy vjetësh Kosovës i është kërkuar të draftojë një status për Asociacionin, dhe se këtë gjë, Qeveria nuk e ka bërë.
“Pse nuk e ka draftuar Qeveria e Kosovës një statut, pse e bjen punën në ditën kur veç mbyllet mbledhja, agjenda që të diskutohet në Komitet të Ministrave”, ka thënë ajo.
“Edhe po ta dërgonin draftin që janë dakorduar në marrëveshjen e Ohrit në Gjykatën Kushtetuese, asnjë mundësi nuk ka që të hyjë sot në agjendë, sepse kjo qeveria mendon se e gjithë bota sillet rreth tyre, aty janë disa rregulla dhe procedura që në asnjë mënyrë nuk tejkalohen”, ka shtuar deputetja në emisionin “Rreth e Rrotull” në RTV Dukagjini.
Musliu – Shoshi ka theksuar se është e pamundur që sot Kosova të jetë temë diskutimi në Komitetin e Ministrave.
Ndryshe, dje, ministrja e Punëve të Jashtme, Donika Gërvalla, ka njoftuar se Qeveria e Kosovës është duke përgatitur një draftstatut për Asociacionin, të cilin pritet ta dërgojë për shqyrtim në Gjykatën Kushtetuese deri në fund të majit.
Kjo është bërë e ditur në një letër drejtuar presidentit të Asamblesë Parlamentare të Këshillit të Evropës, Theodoros Rousopoulos.
Ajo ka njoftuar se në Kushtetuese do ta çojnë një draftstatut të përgatitur nga vetë qeveria dhe jo draftin evropian.
Sipas letrës së Gërvallës, qeveria po punon në një draftstatut të inspiruar nga ai i Fondacionit “Friedrich Ebert” (FES).
Mirëpo, kjo letër e Gërvallës është kritikuar shumë si nga opozita e shoqëria civile, po ashtu edhe nga bashkësia ndërkombëtare, dhe është konsideruar shumë e vonuar për anëtarësim të Kosovës në KiE.
Gjithashtu, edhe Presidenca e Kosovës ka reaguar për letrën e Gërvallës, duke thënë se nuk janë koordinuar me presidenten Osmani.
- “Dorëzohet” qeveria – po përgatit një draftstatut për Asociacionin
- “Krisje” mes Kurtit e Osmanit? – Presidenca nuk e përkrah letrën drejtuar KiE-së