Ministrja e Arsimit, Arbërie Nagavci, ka vizituar të mërkurën, shkollën “Xhemajl Kada” në Pejë, për t’u informuar nga afër për rastin e djeshëm të raportuar në “Festën e Abetares”.
Rasti është konsideruar diskriminues për nxënësit e komunitetit rom, ashkali dhe egjiptian.
Përmes një postimi në Facebook, Nagavci ka thënë se pamjet ishin shqetësuese dhe diskriminimi nuk ka vend në shkollat tona.
“Pamjet e mbrëmshme ishin shqetësuese për të gjithë ne. Këto pamje janë të papranueshme dhe diskriminimi nuk ka vend në shkollat tona”, ka shkruar Nagavci.
Nagavci ka thënë se Ministria e Arsimit ka marrë një varg politikash gjithëpërfshirëse për nxënësit e komunitetit rom, ashkali dhe egjiptian.
“Sivjet për herë të parë do të përkrahim me bursa edhe studentët e këtyre komuniteteve, me synim ata të Fakultetit të Edukimit, në mënyrë që të krijojmë kuadro që do të punojnë në shkollat tona. Është e rëndësishme që këto politika të gjejnë zbatim në të gjitha nivelet dhe në këtë drejtim është po aq i rëndësishëm angazhimi i mësimdhënësve, prindërve, komunitetit dhe mediave e shoqërisë civile”, ka shtuar Nagavci.
Ajo ka thënë ndër të tjera se, për rastin e djeshëm, MAShTI ka dërguar inspektorët, të cilët do ta shqyrtojnë në detaje informatën.
“Nga vizita në shkollë u informova se bëhet fjalë për një klasë të mësimit intenziv, ku ka nxënës të moshave dhe klasave të ndryshme, të cilët janë riatdhesuar ose e kanë braktisur mësimin për arsye të ndryshme”, ka thënë Nagavci.
Nagavci ka shtuar se Kosova ka ende shumë punë për të bërë në fushën e gjithëpërfshirjes dhe dhënien e mundësive të barabarta pë të gjithë fëmijët.
Ndryshe, në Pejë, të martën e 17 majit, është kremtuar Festa e Abetares, por, bashkë me bashkëmoshatarët e tyre nga komunat e tjera nuk ishin edhe dhjetë nxënës të pakicave, të cilët u ulën të ndarë.
Edhe Kryetari i Partisë Liberale Egjiptiane, Veton Berisha, ka kërkuar që dikush të japë përgjegjësi për “segregimin” e fëmijëve të komunitetit rom, ashkalinj, egjiptian në Festën e Abetares në Pejë.