Ministrja e Arsimit, Shkencës, Teknologjisë dhe Inovacionit, Arbërie Nagavci, teksa ka komentuar protestën e Sindikatës së Bashkuar për Arsim, Shkencë dhe Kulturë, (SBASHK), dhe kërkesat e tyre, ka thënë se çdo orë e humbur do të kompensohet.
Ajo ka theksuar që pavarësisht se i mbështet kërkesat për kushte më të mira të punës, ëhstë shprehur kundër mosmbajtjes së mësimit në kohën kur nga pandemia me COVID-19 kanë mbetur shumë ditë të humbura të mësimit.
“Jemi duke punuar si qeveri me një përkushtim të madh në Ligjin për Paga që është kërkesë e drejtë dhe është një nga nevojat për zyrtarët publik, por natyrisht nuk mbështes për asnjë moment mohimin e të drejtës bazike të nxënësve për shkollim”, është shprehur Nagavci në “Kallxo Përnime”.
“Mësimdhënësit kanë të drejtë të protestojnë, të realizojnë të gjitha kërkesat e tyre ka forma të ndryshme para grevës dhe besoj që në këtë periudhë qe ne jemi që ka pas humbje të mëdha të shkaktuara nga pandemia, në fund të vitit shkollor, mohimi i të drejtës për shkollim të nxënësve është në dëm të të gjithë neve”, tha Nagavci.
Ajo shtoi se kanë kërkuar nga drejtoritë e arsimit të dhëna për orët e humbura dhe theksoi se “çdo orë e humbur duhet të kompensohet”.
Ndryshe, më 20 maj, Sindikata e Bashkuar e Arsimit Shkencës dhe Kulturës bashkë me Bashkimin e Sindikatave të Pavarura të Kosovës (BSPK), kanë zhvilluar protestë.
Ndër kërkesat kryesore të sindikatave janë, rritja e pagave për 100 euro për të gjithë të punësuarit që marrin paga nga buxheti i Kosovës deri sa të përmbushen kërkesat e mëposhtme, miratimi i Ligjit të Pagave, rritja e rrogës minimale, e të tjera.
Ndërkohë sindikatat kanë paralajmëruar përsëri protesta dhe greva gjithëpërfshirëse, nëse kërkesat e tyre nuk u realizohen.
Protesta kanë paralajmëruar edhe kategori të ndryshme, sikurse veteranët e UÇK-së, të cilët kanë kërkuar rritjen e pensioneve të tyre.
Po ashtu, mundësinë për protestë nuk e kanë përjashtuar as stafi mbështetës i infermierëve, të cilët ka dy muaj që nuk kanë marrë pagë edhe pse kanë kontrata valide deri në qershor të 2022.