Ministrja e Arsimit, Arbërie Nagavci, në punëtorinë e përbashkët me ministrat dhe kabinetet qeveritare të organizuar nga Zyra e Kryeministrit, ka thënë se arsimi është mundësi dhe burim i rëndësishëm për zhvillimin e qëndrueshëm ekonomik e shoqëror të Kosovës.
Nagavci ka thënë se Kosova “është shoqëri konkurrente e dijes, me mundësi të barabarta për të gjithë qytetarët për t’i kontribuar zhvillimit socio-ekonomik” dhe se misioni i tyre është zhvillimi i arsimit, shkencës dhe inovacionit duke u bazuar në cilësi, qasje gjithëpërfshirëse dhe llogaridhënie.
Nagavci ka shtuar se qëllimet strategjike janë arsimi cilësor gjithëpërfshirës dhe i digjitalizuar, harmonizimi i arsimit dhe aftësimit profesional me kërkesat e tregut të punës, menaxhimi efektiv i sistemit të arsimit në të gjitha nivelet, arsimi i lartë me cilësi dhe integritet, në harmoni me standardet ndërkombetare, dhe përmirësimi i mjedisit për kërkime dhe inovacion.
Minsitrja Nagavci ka theksuar se rezultatet që synojmë të arrijmë gjatë vitit 2023 janë miratimi i politikave kyçe që “çojnë përpara” qëllimet e tyre strategjike.
“Sfidat s’do të jenë të pakta, por do t’i tejkalojmë përmes realizimit të planit për përshpejtim të procedurave administrative, komunikimit më efikas, zbatimit të politikave qendrore e plotësimit të vendeve të lira të punës”, ka potencuar Nagavci.
Tutje ajo është shprehur se është e bindur se do të përballen “me sukses” me sfidat dhee do t’i realizojnë rezultatet e synuara, “sepse arsimi është pika ku duhet dhe do të jemi bashkë”.