Qeveria e Kosovës ka ndarë 4 milionë e 200 mijë euro për blerjen e barnave esenciale për muajt e fundit të këtij viti.
Të mërkurën e 26 tetorit, kërkesa e Shërbimit Spitalor dhe Klinik Universitar i Kosovës u përkrah në mbledhjen e Qeverisë.
Ministri i Financave, Hekuran Murati, ka thënë se bëhet fjalë për kërkesën e SHSKUK-së, për ndarjen e mjeteve shtesë, për sigurimin e barnave esenciale deri në fund të vitit, për tremujorin e fundit.
“Bëhet fjalë për kërkesën e Shërbimit Spitalor Klinik dhe Universitar të Kosovës për ndarjen e mjeteve shtesë, për sigurimin e barnave esenciale deri në fund të vitit, për tremujorin e fundit. Bëhet fjalë për shumën mbi 4 milionë e 200 mijë e 100 euro. Mjetet e ndara sipas kërkesës do të merren nga nënprogrami kontigjencat në Ministrinë e Financave, nga kategoria mallra dhe shërbime dhe transferohen në Shërbimin Spitalor, Klinik dhe Universitar”, ka thënë Murati.
Gjatë kësaj mbledhjeje, Qeveria po ashtu ka ndarë 92 mijë euro për subvencionimin e Samitit të Ballkanit Perëndimor, i cili u mbajt të martën e 25 tetorit në Prishtinë.
“Me samitin e organizuar nga “The Economist” në bashkëpunim me Zyrën e Kryeministrit, Kosova u bë pjesë e hartave të konferencave ndërkombëtare. Organizimi i këtij samiti i kontribuon Kosovës në krijimin e një platforme për shkëmbim të përvojave të akterëve të politikës, ekonomisë dhe tregtisë” ka thënë kryeministri i Kosovës, Albin Kurti.
Ndërkaq, ministri Murati shtoi se “kjo konferencë ka shërbyer si platformë për promovimin e Kosovës pasi ka mbledhur politikanë, ekonomistë, e personalitet të tjera për diskutimin mbi ekonominë”.
“Bizneset kosovare kanë dhënë kontribut për të mbështetur mbajtjen e këtij samiti, por meqë ka nevojë për mbështetje shtesë prej 92 mijë eurosh, kërkojmë që ta miratojmë. Mjetet për këtë merren nga shpenzimet e parashikuara, kategoria rezervat” është shprehur Murati.
Ndarjen e këtyre mjeteve e mbështetën të gjithë ministrat.