Një prej zërave më të shquar të muzikës jazz në Britani dhe më gjerë, Dama Cleo Laine, ka ndërruar jetë në moshën 97-vjeçare.
Lajmi u konfirmua nga familjarët e saj, të cilët bënë të ditur se ajo u nda nga jeta në mënyrë të qetë, e rrethuar nga më të dashurit e saj.
“Me dhimbje të madhe njoftojmë se nëna jonë e dashur, Cleo, është ndarë nga jeta. Ajo solli kaq shumë muzikë dhe dritë në jetët tona dhe në botë. Kërkojmë privatësi ndërsa e kujtojmë me dashuri dhe mirënjohje”, thuhet në deklaratën e fëmijëve të saj, Jacqui dhe Alec Dankworth.
Laine ishte një figurë që la gjurmë të pashlyeshme në skenën muzikore, me një karrierë që shtrihej në gati tetë dekada. E njohur për zërin e saj të veçantë dhe aftësinë e jashtëzakonshme për improvizim, ajo performoi me emra legjendarë të muzikës botërore si Duke Ellington, Ray Charles dhe Frank Sinatra.
Përveç suksesit artistik, Cleo Laine u dallua edhe për rolin e saj në çrrënjosjen e paragjykimeve gjinore dhe racore në një skenë të dominuar nga meshkujt, duke u bërë simbol i përparimit dhe diversitetit në art. Ajo është e vetmja artiste femër që ka marrë nominime për çmimet Grammy si në zhanrin e jazz-it, ashtu edhe në muzikën klasike.
Në vitin 1997, u nderua me titullin “Damë” nga Mbretëresha Elizabeth II, duke hyrë në histori si këngëtarja e parë britanike e jazz-it që merr këtë dekoratë të lartë për kontributin e saj në kulturë.
Cleo Laine do të përcillet në një ceremoni private familjare, ndërsa më vonë gjatë vitit pritet të mbahet një koncert përkujtimor për të nderuar jetën, artin dhe trashëgiminë që la pas në muzikën britanike dhe atë ndërkombëtare.