Është ndar nga jeta Ismet Bellova, një nga figurat më të njohura dhe emblematike të gazetarisë sportive shqiptare.
Me zërin e tij karakteristik dhe stilin e veçantë të komentimit, Bellova u bë pjesë e pandashme e historisë së transmetimeve sportive në Shqipëri, duke komentuar dhjetëra ndeshje e ngjarje që shënuan breza të tërë sportdashësish.
Ismet Bellova lindi në Tiranë më 1 qershor 1934. Studimet e larta i përfundoi në ILKF “Vojo Kushi” në vitin 1960, ndërsa jetën profesionale ia kushtoi me përkushtim arsimit fizik dhe gazetarisë sportive. Ai ishte i martuar me Mjeshtren e Merituar të Sportit, Bukuroshe Shtiza.
Rrugëtimi i tij në sport nisi herët. Në vitin 1948 ai u shpall kampion i vendit për të rinj në pingpong. Emri i Bellovës hyri në historinë e transmetimeve sportive më 29 nëntor 1950, kur komentoi ndeshjen Dinamo–Partizani 1–0, finalen e Kupës së Shqipërisë, duke shënuar fillimin e një karriere të gjatë dhe të suksesshme në Radio Tirana.
Për kontributin e jashtëzakonshëm në sport, arsim dhe gazetari, Ismet Bellova u nderua me një sërë titujsh dhe dekoratash të larta shtetërore e sportive, ndër to: “Mësues i Popullit”, Urdhrin “Naim Frashëri” Klasi i Artë, Urdhrin e Punës Klasi I, “Nderi i Sportit Shqiptar”, “Urdhri Olimpik”, “Mirënjohja e Tiranës”, “Nderi i Sportit Dibran” dhe titullin “Kalorësi i Urdhërit të Flamurit”.
Gjatë jetës së tij u vlerësua edhe me çmime prestigjioze profesionale. Në vitin 2004 u themelua Çmimi “Ismet Bellova” në gazetarinë sportive. Ai mori Çmimin e Karrierës në RTSH, dy herë Çmimin “Anton Mazreku”, si dhe “Mikrofonin e Artë”.
Ndarja nga jeta e Ismet Bellovës përbën një humbje të madhe për sportin dhe median shqiptare. Kujtimi dhe trashëgimia e tij do të mbeten të gjalla te brezat që ai edukoi, te dëgjuesit që e ndoqën ndër vite dhe në historinë e sportit shqiptar, ku emri i tij zë një vend nderi.