Të enjten e 1 shtatorit, nënkryetari i Komunës së Prishtinës, Alban Zogaj, ka thënë se nuk e ka marrë pagën si zakonisht, e vendimin e Ministrisë së Financave për ekzekutimin e pagave të pjesshme për grevistët, Zogaj e ka quajtur si të “papranueshëm dhe të jashtëligjshëm”.
“Ministria e Financave ka vendosur që të mos i procesojë pagat për Komunën e Prishtinës!!! Totalisht e papranueshme dhe e jashtëligjshme. Komunat kanë buxhetet e veta, dhe janë punëdhënësit e pavarur”, ka shkruar Zogaj në Twitter.
Sot nuk jam pguar, si zakonisht, sepse Ministria e Financave ka vendosur mos me i procesu pagat per Komunen e Prishtines!!! Totalisht e papranueshme dhe e jashteligjshme. Komunat kane buxhetet e veta, dhe jane punedhenes i pavarur. pic.twitter.com/LE0vGkWv4P
— Alban Zogaj (@albanzogaj) September 1, 2022
Ndërkaq, të mërkurën e 31 gushtit, Ministri i Financave, Hekuran Murati, ka thënë se ekzekutimi i pagave për këtë muaj është bërë vetëm i pjesshëm, për arsye se sipas tij, organizatat buxhetore nuk i kanë dërguar listat e atyre që kanë dalë në punë me kohë.
Po ashtu, më 25 gusht, Ministria e Financave ka kërkuar nga Këshilli Grevist listën e personave që po marrin pjesë në grevë, për t’ua ndërprerë pagën sipas nenit 18 të Ligjit për Greva.
Ministri Murati ka thënë se përderisa e drejta e grevës dhe grumbullimit është e garantuar me ligj, po ashtu praktikat dhe konventat ndërkombëtare nuk e obligojnë punëdhënësin që të paguajë punëtorin sa është në grevë.
Sipas tij, është obligim i sindikatës që t’i kompensojë grevistët, mirëpo ligji për grevë thotë të kundërtën.
Komunat nuk i dorëzojnë listat e grevistëve, Qeveria nuk i proceson pagat për ta