Ministrja e Drejtësisë, Albulena Haxhiu, së bashku me ministrin e Mjedisit, Planifikimit Hapësinor dhe Infrastrukturës, Liburn Aliu, kanë nënshkruar një memorandum bashkëpunimi për digjitalizimin e sistemit noterial në Kosovë.
Siç ka njoftuar Ministria e Drejtësisë, ky memorandum vlerësohet si një hap i rëndësishëm drejt modernizimit të sistemit noterial në Kosovë.
Përmes kësaj platforme, noterët do të kenë qasje më të lehtë në të dhënat e Sistemit të Informatave Kadastrale për Tokën, të cilat mirëmbahen nga Agjencia Kadastrale e Kosovës.
Po ashtu, ky memorandum do të përmirësojë efikasitetin dhe efektivitetin e shërbimeve notariale, duke mundësuar qasje të shpejtë në informacione të sakta dhe të verifikuara në kohë reale.
Memorandumi gjithashtu përcakton procedurat për shkëmbimin e të dhënave, rregullat e sigurisë, dhe procedurat për qasje dhe përdorim të të dhënave.
“Ky memorandum i bashkëpunimit, i cili ka për qëllim mundësimin e qasjes së noterëve në të dhënat e Sistemin e Informatave Kadastrale për Tokën në Kosovë që mirëmbahet nga Agjencia Kadastrale e Kosovës mundëson përcaktimin e procedurave për shkëmbimin e të dhënave, përcaktimin e rregullave të sigurisë, procedurave përkatëse për qasje dhe përdorim të të dhënave, si dhe krijimin e lehtësirave të nevojshme administrative për bashkëpunim ndërinstitucional në mes të institucioneve respektive me qëllim të rritjes së efikasitetit dhe efektivitetit të shërbimit të noterisë”, thuhet në njoftimin e Ministrisë së Drejtësisë.
Siç thuhet tutje në njoftim, ky bashkëpunim ndërinstitucional në mes të Ministrisë së Drejtësisë dhe Ministrisë së Mjedisit do të ndihmojë në harmonizimin e procedurave të brendshme në një sistem të centralizuar dhe të ndërlidhur.