Kryeministri i Kosovës, Albin Kurti, ua ka uruar qytetarëve Vitin e Ri nga vizita e tij tek punonjësit e Korporatës Energjetike të Kosovës (KEK).
“Me ata të cilët punojnë që ne të festojmë, nga vendi prej nga na vjen ndriçimi sonte teksa urojmë njëri-tjetrin, gëzuar Viti i Ri 2023, të gjithë juve të dashur qytetarë, familjeve, miqve e kolegëve tuaj”, ka shkruar Kurti në rrjetin social Facebook.
Gjithashtu, presidentja e vendit, Vjosa Osmani, në adresimin e saj drejtuar qytetarëve për Vitin e Ri 2023, ka thënë se viti 2022 nuk ka qenë i lehtë, pasi sipas saj, ishte me të gjitha sfidat e sigurisë globale, të cilat kanë rezultuar me sfida ekonomike e të energjisë, që janë ndjerë nga secila familje.
Ndryshe kujtojmë se, Qeveria e Kosovës në mbledhjen e 117-të të mbajtur në mënyrë elektronike më 30 dhjetor ka ndarë 37 milionë e 500 mijë euro për furnizim me energji elektrike dhe mbrojtje të sistemit energjetik.
Prej këtyre mjeteve buxhetore, 20 milionë euro janë ndarë për KEK-un dhe 17 milionë e 500 mijë euro janë ndarë për Operatorin e Sistemit të Transmisionit dhe Tregut (KOSTT).
Mjetet sipas këtij vendimi merren nga kursimet buxhetore.
Me këtë vendim, Qeveria kishte thënë se ndihmon përmbushjen e obligimit për të ndihmuar sigurimin e energjisë elektrike për tremujorin e parë të 2023.
Ndërkaq, KEK-u më 22 dhjetor kishte marrë vendimin që t’u ndajë 500 euro shtesë punëtorëve të saj për fundvit.