Të hënën e katër prillit, Komuna e Prishtinës ka nisur me ndërmarrjen e lirimit të hapësirave publike.
Kjo është bërë e ditur nga nënkryetari i Prishtinës, Alban Zogaj, i cili përmes një postimi në Twitter, ka thënë se ky është një ndër prioritetet e qeverisjes së komunës.
“Hapësirat publike po lirohen! Ky është prioritet i qeverisjes sonë”, ka shkruar Zogaj.
Siç shihet në fotografi, nga oborri i kampusit universitar është larguar një orë e vendosur nga disa kompani private.
Një e tillë është larguar edhe në afërsi të objektit të komunës së Prishtinës.
Hapësirat publike po lirohen! Ky është prioritet i qeverisjes sonë. #Prishtina pic.twitter.com/VdfQ2oeB2o
— Alban Zogaj (@albanzogaj) April 4, 2022
Ndërkaq, më 11 mars, Drejtori i Investimeve Kapitale dhe Menaxhimit të Kontratave në Komunën e Prishtinës, Krenar Xhaferi, kishte njoftuar se ka filluar largimi i pengesave brenda rrethrrotullimit në Arbëri.
“Sot filluam largimin e pengesave brenda rrethrrotullimit në Arbëri, e njëjta do të ndodhë edhe për pengesat brenda rrethrrotullimit tek rruga B, që lidhet me rrugën ‘Muharrem Fejza’”, kishte shkruar Xhaferi në Facebook.
Sipas tij, ky aksion ishte ndërmarrë për shkak të ankesave të shumta nga qytetarët.
“Do të vazhdojmë edhe me shumë aksione të tilla, për ta liruar komunikacionin dhe për të bërë zgjidhje për të. Së bashku do t’ia dalim”, kishte njoftuar ai.
Ndryshe, Përparim Rama nga Lidhja Demokratike e Kosovës arriti të fitojë në balotazh me 50.98 për qind të votave të përgjithshme, teksa la pas kundër kandidatin nga Lëvizja Vetëvendosje, Arben Vitia, i cili arriti të marrë 49.02 për qind të votave.
Ai detyrën e kryetarit të komunës së Prishtinës zyrtarisht e ka marrë më shtatë dhjetor të vitit 2021.
Teksa kishte dhënë betimin si kryetar i cili do të qeverisë për katër vjetët e ardhme në kryeqytetin e Kosovës, në ceremoninë inaguruese, Rama kishe thënë se “prej sot zëri i qytetarëve, vullneti i mirë për të bërë ndryshime të mbara e afatgjata në Prishtinën tonë të zemrës nuk është më moto e fushatës por zotim i imi dhe ekipit tim”.