Një grua 59-vjeçare me inicialet R.M. është gjetur e pajetë mëngjesin e sotëm në kanalin e Ibër-Lepencit, në komunën e Zubin Potokut.
Policia ka njoftuar se rreth orës 07:20 ka pranuar informatën se viktima kishte dalë nga shtëpia e saj në orët e hershme, rreth orës 06:40, dhe dyshohej se kishte rënë në kanal.
Pas kërkimeve në terren nga njësitë policore dhe zjarrfikësit, trupi i pajetë u gjet rreth orës 08:00, afërsisht tre kilometra nga vendi ku dyshohej se kishte rënë.
Në vendngjarje ka dalë ekipi mjekësor, i cili ka konstatuar vdekjen, ndërsa policia dhe njësitë e hetimeve rajonale kanë nisur procedurat hetimore.
Me urdhër të Prokurorit të Shtetit, trupi i pajetë është dërguar për obduksion.
Policia e Kosovës ka bërë të ditur se është duke vijuar me veprimet e nevojshme ligjore në koordinim me institucionet relevante.