Lëvizja Vetëvendosje në një video përmbledhëse të sulmit serb në Banjskë, ka thënë se ky sulm i zhveshi pretendimet e Serbisë mbi territorin e Kosovës, derisa ka shtuar se “tash është koha për sanksione”.
Kjo video vjen një muaj pas sulmit terrorist të 24 shtatorit, ku mbeti i vrarë rreshteri policor, Afrim Bunjaku.
“Policia e Kosovës e kontrollon secilën pjesë të territorit të Republikës së Kosovës. Menduan që vetëm mund të hyjnë dhe nuk i prekë askush në synimet e tyre terroriste… Shtetet që sponsorizojnë terrorizmin si Serbia mund të provojnë skenar të ngjashëm sërish, por përgjigja do të jetë edhe më vendimtare”, thuhet në videon e VV-së.
“Duhet pikëprerje e qartë në raport me aktin e 24 shtatorit. Republika e Kosovës angazhohet për paqe, siguri, bashkëpunim për zhvillim me të gjithë qytetarët, e sidomos të komunitetit serb”.
Ndryshe, për organizimin e këtij sulmi, përgjegjësinë e kishte marrë ish-nënkryetari i Listës Serbe, Millan Radojçiq.