Nora Gjakova ka fituar medaljen e argjendtë në Grand Slamin, që është duke u mbajtur në Abu Dhabi të Emirateve të Bashkuara Arabe.
Xhudistja nga Kosova, ka humbur ndeshjen e fundit në finale, pas katër fitoreve radhazi gjatë ditës së premte.
Kësaj radhe, në finale, Nora ka humbur ndaj kundërshtares nga Koreja e Jugut, Mimi Huh.
Ajo ka arritur ta fitojë medaljen e argjend në kategorinë deri në 57 kilogramë.
Kjo ishte medalje e parë dhe gara e parë për Norën që nga Lojërat Olimpike “Tokio 2020”, pasi xhudistja jonë ishte jashtë garave për plot 15 muaj shkaku i një lëndimi në krahë.
Ndërkaq, Nora në raundin e parë ka fituar me ‘pikë të artë’ ndaj xhudistes nga Koreja e Jugut, Yuna Shin, ndërsa në luftën e dytë mposhti me ‘ippon’ dhe brenda më pak se 1 minute holandezen, Pleuni Cornelisse.
Në çerekfinale, kampionia olimpike arriti ta mposht kundërshtaren serbe, Marica Perisic, e cila mori tri penalizime, teksa në gjysmëfinale arriti të fitojë ndaj kundërshtares Eteri Liparteliani nga Gjeorgjia.
Për Norën është medalja e katërt në garat e nivelit Grand Slam, pasi ka edhe dy të arta.
Gjithashtu, në Abu Dabi garojnë edhe Laura Fazliu dhe Loriana Kuka. Të shtunën do të garojë Fazliu (-63 kg), ndërsa të dielën Kuka (-78 kg).
Nora Gjakova ka kaluar në finale të Grand Slamit në Abu Dhabi