Sulmuesi i Muras, Mirlind Daku, ka folur ekskluzivisht për emisionin “Dueli Sportiv” në RTV Dukagjini rreth mos ftesës së tij nga Kombëtarja e Kosovës për dy ndeshjet e muajit qershor.
Ai ka thënë se ka pritur të ftohet dhe ka qenë i gatshëm t’i ndihmojë “Dardanëve”.
“E kam ndjerë besimin në vete se jam i gatshëm t’i ndihmoj Kombëtares, marrë parasysh edhe mungesat që i ka Kombëtarja në pozitën time që është vetëm Muriqi. E kam parë që mundem t’i ndihmoj sado pak Kosovës nëse ka nevojë,” tha Daku.
Tutje, 25-vjeçari tregoi se nuk ka pasur asnjë kontakt nga Federata e Futbollit e Kosovës.
“Jo nuk kemi pasur asnjë kontakt,” theksoi ai.
Kujtojmë se Mirlind Daku kishte qenë golashënuesi i dytë më i mirë në Superligën e Sllovenisë me 19 gola.
“Dueli Sportiv” do të vazhdojë çdo të diel me fillim nga ora 22:00.
Përveç diskutimeve për sportin vendor po ashtu do të ketë edhe shumë risi të tjera në vazhdim.