Kryetari i Komunës së Preshevës, Shqiprim Arifi, ka reaguar pasi shteti i Serbisë i ka detyruar ligjërisht që edhe shkollat shqiptare së bashku me nxënësit në Luginën e Preshevës të intonojnë himnin e Serbisë për ditën e parë të shkollës.
Arifi ka thënë se kjo është një padrejtësisë.
“Kryeministri Albin Kurti është i mirëseardhur për vizitë në shkollën fillore më të madhe shqiptare në Luginën e Preshevës, të njoftohet për së afërmi me këtë padrejtësi dhe një mijë padrejtësi të tjera”.
“Në dokumentin që po ndaj me ju, pasqyrohet vendimi për detyrimin e intonimit të himnit serb “Bože Pravde” në shkollat shqiptare të Luginës së Preshevës”.
Më tej, ai ka ngritur disa pyetje, “kur jemi te reciprociteti, cilat aktivitete e zhvillime janë ndërmarrë dhe planifikuar në këtë drejtim nga Qeveria e Republikës së Kosovës?”.
Sipas Arifit, simbolet kombëtare të shqiptarëve janë të ndaluara në Luginën e Preshevës, dhe shqiptarët nuk i gëzojnë as të drejtat elementare.
Tani shtrohet pyetja retorike, si qëndron e tëra kjo me të drejtat elementare të shqiptarëve në Luginë, kur dihet se simbolet kombëtare shqiptare janë të ndaluara.