Ndihmës Sekretari amerikan i Shtetit, James O’Brien, ka diskutuar të mërkurën me kryeministrin e Kosovës, Albin Kurti, të cilit i ka kërkuar përparim urgjent në themelimin e Asociacionit të komunave me shumicë serbe.
Në një postim në platformën X, O’Brien ka thënë se për të ecur përpara duhet zbatimi i marrëveshjeve të arritura përmes ndërmjetësimit të BE-së.
“SHBA-ja mbështet rrugën e Kosovës drejt integrimeve euroatlantike. Për të ecur përpara, ne kemi nevojë për zbatimin e zotimeve të ndërmjetësuara nga BE-ja, duke përfshirë përparimin urgjent në Asociacionin e Komunave me shumicë serbe. Kam diskutuar hapat pozitivë të nevojshëm me kryeministrin e Kosovës Kurti sot”, ka shkruar ai në X.
Kryeministri Kurti dhe O’Brien kanë zhvilluar takimin këtë të mërkurë gjatë qëndrimit në Gjermani.
🇺🇸supports Kosovo’s path to Euro-Atlantic integration. To move forward, we need implementation of EU-facilitated Dialogue commitments, including urgent progress on the Association of Serb-majority Municipalities. I discussed the positive steps needed with Kosovan PM Kurti today. pic.twitter.com/aCXTVssVFD
— Assistant Secretary Jim O’Brien (@StateEUR) April 24, 2024
Gjithashtu, mbrëmjen e së martës, presidenti i Francës, Emmanuel Macron ka telefonuar kryeministrin Kurti, të cilit ia ka përmendur rëndësinë e zbatimit të Asociacionit në kontekstin e anëtarësimit të Kosovës në Këshill të Evropës.
Kështu është njoftuar nga Presidenca franceze, ku thuhet se Macron ia ka rikujtuar Kurtit mbështetjen e palëkundur të Francës për pavarësinë dhe integrimin evropian të Kosovës.
Osmani: Draft-statuti i Asociacionit do të dërgohet në Kushtetuese
Ndërsa, më 23 prill, presidentja, Vjosa Osmani ka thënë se Kosova nuk kundërshton zbatimin e detyrimeve të veta, por kërkon një marrëveshje të detyrueshme si për Kosovën dhe Serbinë.
Osmani ka folur edhe për Asociacionin duke thënë se “e dimë që ky është detyrim ndërkombëtar i Kosovës, por janë disa parime të cilat i kemi parasysh dhe i kemi si vija të kuqe në zbatimin” e tij.