Policia e Kosovës, përmes Drejtorisë për Hetimin e Trafikimit me Narkotikë, ka realizuar operacionin e koduar “Freeshopi”, duke arrestuar tre persona të dyshuar, përfshirë një zyrtar policor.
Pas hetimeve disa mujore në bashkëpunim me Prokurorinë e Krimeve të Rënda, policia ka gjetur rreth 370 gram substancash narkotike, një peshore, tri thika dhe 4,870 euro gjatë kontrollit të të dyshuarve.
“Gjatë realizimit të planit taktik antidroga e Policisë së Kosovës e mbështetur edhe nga njësitet për reagim të shpejtë (NJRSH) tek personat e dyshuar dhe gjatë kontrollit në trup dhe në lokacionet të tyre ka gjetur sasi e substancave narkotike me peshë rreth 370 gram, një peshore, tri thika dhe para të gatshme (4870) euro”, thuhet në njoftim.
Siç thuhet në njoftimin e PK-së, Inspektorati Policor i Kosovës (IPK), është njoftuar për përfshirjen e zyrtarit, ndërsa tre të arrestuarit janë dërguar në qendrën e mbajtjes për procedura të mëtejshme ligjore.
“Lidhur me përfshirjen e zyrtarit policor në këtë rast menjëherë është njoftuar Inspektorati Policor i Kosovës (IPK), për procedura të mëtejme. Në konsultim me Prokurorin nga Departamenti i Krimeve të Rënda është iniciuar rasti dhe tre personat e dyshuar dërgohen në qendrën e mbajtjes për proceduar të mëtejme ligjore. Rasti mbetet të hetohet nga antidroga e Policisë së Kosovës (PK), Inspektorati Policor i Kosovës (IPK) dhe Prokuroria e Krimeve të Rënda në Prishtinë”, thuhet në njoftimin e PK-së.
Rasti do të hetohet nga njësitë përkatëse të Policisë dhe Prokurorisë.