Prokuroria Themelore në Ferizaj, Departamenti i Krimeve të Rënda, në koordinim me Policinë e Kosovës, përkatësisht Drejtorinë për Hetimin e Trafikimit me Narkotik, të mërkurën ka zhvilluar operacionin e koduar “Mali”.
Gjatë kontrollit të shtëpive, janë gjetur 26 paketime najloni të mbushura me substancë të dyshuar narkotike të llojit marihuanë, me peshë të përgjithshme prej pesë kilogramësh. Gjatë këtij operacioni janë arrestuar tre persona të dyshuar.
Pas një hetimi disamujor, me urdhër të lëshuar nga Gjykata Themelore në Ferizaj, është bërë kontrolli i shtëpive, banesave dhe objekteve përcjellëse, në fshatrat Ivajë dhe Kaçanik, nën dyshimin se në të njëjtat shtëpi është duke u bërë kultivimi i bimëve narkotike të llojit ”Canabis Sativa”.
Të dyshuarit, me vendim të Prokurorit të Shtetit, janë ndaluar në paraburgim me kohëzgjatje prej 48 orësh, për shkak të dyshimit se të njëjtit kanë kryer veprat penale “Kultivimi i bimës së hashashit, shkurres së kokainës ose bimëve të kanabisit” dhe “Mbajtja në pronësi, kontroll ose posedim të paautorizuar të armëve”.
Prokuroria Themelore në Ferizaj, ndaj të njëjtëve, brenda afatit ligjor, do të paraqesë kërkesë për caktimin e masës së paraburgimit në Gjykatën Themelore në Ferizaj.
Po ashtu, gjatë këtij operacioni, janë sekuestruar edhe para të gatshme, në vlerë prej 160 eurosh, armë pistoletë e llojit Sigsauer, gërshërë, thika, qese najloni për paketim, kamera të sigurisë, dhe kartela bankare.