Kryetari i Partisë Demokratike të Kosovës, Memli Krasniqi, ka uruar qytetarët lidhur me vendimin e Parlamentit Evropian për liberalizimin e vizave për Kosovën.
Krasniqi në një postim në Facebook shkruan se ky vendim, edhe pse shumë i vonuar, është i mirëseardhur dhe i merituar.
“Vendimi i Parlamentit Evropian për liberalizimin e vizave për qytetarët e Kosovës, edhe pse shumë i vonuar, është më se i merituar e i mirëseardhur”, ka theksuar tutje Krasniqi.
Kreu i LDK-së, Lumir Abdixhiku ditën e sotme e ka quajtur të paharruar për qytetarët pas një trajtim i padrejtë po merr fund.
Abdixhiku në një postim në Twitter shkruan se lajmi i shumëpritur për liberalizimin e vizave përfundimisht u miratua nga Parlamenti Evropian.
“Një ditë e paharrueshme për Republikën e Kosovës dhe qytetarët e saj pasi liberalizimi i shumëpritur i vizave miratohet përfundimisht nga Parlamenti Evropian.
Një trajtim i padrejtë dhe i padrejtë më në fund e sheh fundin. Ne e festojmë këtë moment historik dhe presim me padurim një të ardhme brenda familjes evropiane”, ka theksuar Abdixhiku.
A memorable day for the Rep. of Kosovo and its citizens as the long-awaited visa liberalization is finally approved by the European Parliament.
An unfair and unjust treatment finally sees its end. We celebrate this milestone and look forward to a future within European family.
— Lumir Abdixhiku (@LumirAbdixhiku) April 18, 2023
Me këtë rast, ka reaguar edhe kryetari i Aleancës për Ardhmërinë e Kosovës, Ramush Haradinaj, i cili e ka mirëpritur vendimin e Parlamentit Evropian për heqjen e vizave për Kosovën.
Haradinaj e ka quajtur lajm të mrekullueshëm këtë vendim.
“Lajm i mrekullueshëm nga Parlamenti Evropian, që sot heqi pengesën e fundit për liberalizimin e vizave për Kosovën! Falënderim i veçantë për eurodeputetët për marrjen e këtij vendimi meritor dhe për gjithë ata që kontribuan që ky proces të përmbyllet me sukses”, ka shkruar Haradinaj.
I pari i AAK-së, ka shtuar se tashmë është momenti që Kosova po ashtu ta marrë sa më shpejt konfirmimin për anëtarësim në Këshillin e Evropës dhe fillimin e Partneritetit për Paqe.
“Urime Kosovë”, ka përfunduar Haradinaj.
Ndërsa kryetari i AKR-së, Behgjet Pacolli, po ashtu ka uruar liberalizimin e vizave për Kosovën, i cili do të hyjë në fuqi më 1 janar të vitit të ardhshëm.
Pacolli, përmes një shkrimi në Facebook, tha se kjo është ditë historike për vendin, edhe pse, sipas tij, e vonuar.
“Urime të gjithë qytetarëve të Kosovës! Një ditë historike për vendin tonë. Edhe pse e vonuar! Eurodeputetët më në fund miratojnë liberalizimin e vizave me Kosovën. Nga 1 janari lëvizim të gjithë të lirshëm! Akti do të nënshkruhet sot në ligj nga Presidentja e Parlamentit Evropian Roberta Metsola dhe Presidenca suedeze e BE-së”, ka shkruar Pacolli në Facebook.
Parlamenti Evropian të martën e 18 prillit i tha po liberalizimit të vizave për Kosovën, duke e përmbyllur kështu këtë proces të stërzgjatur për qytetarët e Kosovës.
Miratimi i liberalizimit të vizave për Kosovën nga Parlamenti Evropian u bë pa votim, pasi nuk kishte asnjë kundërshtim.