Presidentja e Kosovës, Vjosa Osmani, ka deklaruar se gjatë qëndrimit në Bruksel e ka falënderuar përfaqësuesen e Lartë të Bashkimit Evropian, Kaja Kallas, për mbështetjen e vazhdueshme ndaj integrimit evropian të Kosovës.
Osmani ka bërë të ditur se, pas njoftimit për heqjen e pjesshme të masave nga BE-ja, ka ritheksuar domosdoshmërinë e heqjes së plotë të tyre, duke theksuar se Kosova tashmë i ka përmbushur të gjitha kushtet e vendosura nga Bashkimi Evropian.
“Pas njoftimit për heqje të pjesshme të masave, ritheksova domosdoshmërinë e heqjes së tyre të plotë, meqë të gjitha kushtet e vëna nga Bashkimi Evropian tanimë janë plotësuar”, ka shkruar Osmani.
Ajo ka shtuar se institucionet e Kosovës do të vazhdojnë bashkëpunimin e ngushtë me përfaqësuesit e BE-së dhe partnerët ndërkombëtarë deri në heqjen e plotë të masave ndaj Kosovës.
“Ne do të vazhdojmë të punojmë ngushtë me znj. Kallas dhe me të gjithë partnerët tanë deri në heqjen e plotë të këtyre masave,” ka theksuar presidentja Osmani.