Presidentja e Kosovës, Vjosa Osmani, ka bërë thirrje për konstituimin sa më të shpejtë të Kuvendit dhe formimin e qeverisë së re, duke e cilësuar këtë proces si një urgjencë për vendin.
Pas afro 60 seancave të mbajtura, të martën Kuvendi zgjodhi Dimal Bashën nga Lëvizja Vetëvendosje si kryetar të Kuvendit, me 73 vota pro. Po ashtu, janë zgjedhur edhe tre nënkryetarë nga radhët e partive shqiptare: Albulena Haxhiu, Vlora Çitaku dhe Kujtim Shala, si dhe Emilija Rexhepi nga pakicat joserbe.
Megjithatë, procesi i konstituimit mbeti i papërfunduar për shkak të moszgjidhjes së nënkryetarit nga komuniteti serb.
“Që Kuvendi të konstituohet urgjentisht, që qeveria të zgjidhet po ashtu urgjentisht, çdo ditë e humbur është ditë e humbur për Kosovën, për popullin e saj, për perspektivën tonë euroatlantike, kështu që shpresoj që të gjendet një zgjidhje në përputhje me Kushtetutën”, ka thënë Osmani.