Presidentja e Kosovës, Vjosa Osmani është takuar sot me ambasadorin e SHBA-ve në Kosovë, Jeffrey Hovenier.
Në këtë takim u diskutua për zhvillimet e fundit, me theks të veçantë situatën e sigurisë pas sulmit në veri të Kosovës, ku nga akti terrorist i grupeve kriminale serbe, u vra rreshteri i policisë së Kosovës Afrim Bunjaku dhe disa policë tjerë u plagosën.
“Ajo gjithashtu ka thënë se shpreson se pasi shtetet aleate të përfundojnë procedurat e tyre të brendshme për konfirmimin e informacioneve që kanë të bëjnë me sulmin e fundit ndaj Kosovës, do të ndërmarrin masa konkrete dhe sanksione ndaj Serbisë, për shkak të involvimit të saj të drejtpërdrejtë në këtë sulm, qoftë si shtytëse, organizatore apo lehtësuese e tij”, njofton Presidenca.
Presidentja Osmani ka falenderuar SHBA-të, për mbështetjen dhe solidaritetin pas vrasjes së heroit të Kosovës Afrim Bunjaku, si dhe bashkëpunimin.
“Presidentja ka theksuar se për këtë sulm terrorist dhe akt agresioni nga ana e Serbisë duhet të ketë përgjegjësi nga ana e shtetit serb”, njofton Presidenca.