Eric Pope, përfaqësuesi i Organizatës Ndërkombëtare të Frankofonisë (ONF) për Evropën Qendrore dhe Lindore, është pritur në takim nga presidentja e Republikës së Kosovës, Vjosa Osmani.
Në një njoftim nga Presidenca thuhet se Osmani ka riafirmuar përkushtimin e Kosovës ndaj vlerave frankofone, duke nënvizuar angazhimin e vendit për mbrojtjen dhe promovimin e të drejtave dhe lirive themelore, forcimin e demokracisë dhe sundimin e ligjit.
Ajo ka theksuar se rinia kosovare është një potencial i madh për rajonin dhe më gjerë për shkak të talentit të saj në ndërmarrësi dhe inovacion.
“Presidentja e Republikës së Kosovës, Vjosa Osmani, ka pritur sot në takim përfaqësuesin e Organizatës Ndërkombëtare të Frankofonisë (ONF) për Evropën Qëndrore dhe Lindore, Eric Pope, i cili viziton Kosovën pas aplikimit të Republikës sonë në këtë organizatë.
Presidentja Osmani ka riafirmuar përkushtimin e Kosovës ndaj vlerave frankofone, duke theksuar rëndësinë e ngritjes së statusit të Kosovës në ONF nga statusi i vëzhguesit në anëtar me të drejta të plota.
Presidentja Osmani ka theksuar se Kosova është shembull i mbrojtjes dhe promovimit të të drejtave dhe lirive themelore të të gjithë qytetarëve pa dallim, forcimit të demokracisë dhe sundimit të ligjit”, thuhet në njoftim.
“Rinia është potenciali më i madh i Kosovës dhe me talentin e dëshmuar në ndërmarrësi dhe inovacion, është shembull për rajon e më gjerë”, citohet të ketë thënë Osmani.