Presidentja e vendit, Vjosa Osmani, ka mirëpritur homologun e saj nga Malta, George Vella. Në konferencën e përbashkët, Osmani ka thënë se kjo vizitë është dëshmi e bashkëpunimeve mes dy vendeve.
Osmani tha se e synojnë zgjerimin e dialogut me vendet e Mesdheut, prandaj Malta konsiderohet si partner i rëndësishëm në këtë proces.
Ndërsa, për mosliberalizimin e vizave, presidentja Osmani ka thënë se duhet t’i jepet fund përjashtimit të padrejtë të qytetarëve të Kosovës nga ky proces. Ajo shtoi se shpreson që vendimi të merret më së largu deri në dhjetor të këtij viti.
“Orientimi strategjik i vendit tonë është i padiskutueshëm, dhe Kosova ka përafrim 100 për qind me vendimet e politikës së brendshme”, është shprehur Osmani.
Ndërkaq, për anëtarësimin e Kosovës në Këshillin e Evropës, Osmani ka shtuar se ky do të ishte vendim që ndihmon në ngritjen e nivelit të mbrojtjes së të drejtave të njeriut për të gjithë qytetarët e Kosovës.
Për aplikacionin në anëtarësimin në BE, presidentja Osmani u shpreh se ky do të ishte hapi i parë që BE do të rikonfirmonte dhe një herë që orientimi euroatlantik dhe perspektiva e Kosovës janë interesa gjeostrategjikë të vetë Bashkimit Evropian.