Presidentja e Kosovës, Vjosa Osmani, ka pritur të hënën në takim ambasadorët e vendeve të QUINT-it në Kosovë dhe shefin e zyrës së BE-së në Kosovë, Tomas Szunyog.
Në takim me ambasadorin e Mbretërisë së Bashkuar, Nicholas Abbott, ambasadorin e Gjermanisë, Jorn Rohde, ambasadorin e Italisë, Antonello De Riu, ambasadorin Francës, Olivier Guerot, Zëvendës Shefen e Misionit të Shteteve të Bashkuara, Alyson Grunder, si dhe Shefin e Zyrës së BE-së në Kosovë, Tomas Szunyog, e para e vendit ka diskutuar për zhvillimet e fundit në vend, përfshirë dialogun me Serbinë, hapat e mëtutjeshëm, si dhe koordinimin e vazhdueshëm të institucioneve të Republikës me aleatë.
Osmani në këtë takim ka potencuar se dakordimi rreth aneksit për zbatimin e marrëveshjes bazë duhet të ketë parasysh parimet e miratuara në Kuvendin e Republikës së Kosovës rreth paprekshmërisë së sovranitetit, integritetit territorial, kushtetutshmërisë dhe funksionalitetit të shtetit të Kosovës.
Presidentja Osmani po ashtu ka theksuar se Kosova vazhdon të mbetet palë konstruktive karshi dialogut me Serbinë, dhe vazhdon të jetë e përkushtuar për një proces i cili kontribuon në paqe, siguri dhe prosperitet të qëndrueshëm në vend e rajon.