Presidentja e Republikës së Kosovës, Vjosa Osmani të premten e 22 korrikut, ka pritur në takim deputetin shqiptar në Parlamentin e Serbisë, Shaip Kamberi.
Presidentja e ka uruar Kamberin i cili ka fituar edhe një mandat tjetër në parlamentin e Serbisë.
E para e vendit ka thënë që përfaqësimi i shqiptarëve nga Kamberi do jetë zë i fuqishëm për kërkesat e shqiptarëve të Luginës.
“Sipas Presidentes Osmani është e rëndësishme që u sigurua vazhdimësia e përfaqësimit të shqiptarëve të Preshevës, Medvegjës e Bujanocit dhe se Shaip Kamberi do të jetë zëri artikulues i kërkesave të shqiptarëve”, ka theksuar Osmani.
Ajo më tej ka thënë që në takimet e saj me përfaqësues ndërkombëtar ka ngritur shqetësimin për problemet e shqiptarëve në Preshevë, Medvegjë e Bujanoc.
Sipas saj është i rëndësishëm koordinimi i institucioneve të Republikës së Kosovës dhe përfaqësuesve shqiptarë të Preshevës, Medvegjës e Bujanocit për t’i adresuar të gjitha çështjet që ndërlidhen me pozitën e tyre.
Kurse deputeti Shaip Kamberi ka falënderuar Presidenten Osmani, e cila vazhdimisht ka folur për problemet me të cilat përballen shqiptarët e Preshevës, Medvegjës e Bujanocit.