Presidentja e Kosovës, Vjosa Osmani, ka pritur në takim ambasadorin amerikan në Kosovë, Jeff Hovenier.
Në këtë takim është diskutuar për zhvillimet e fundit në vend, si dhe ato në rrafshin e bashkëpunimit bilateral.
Në fokus të veçantë gjatë këtij takimi ishte miratimi i Programit të Shitjeve Ushtarake nga Departamenti i Shtetit të SHBA-ve.
“Me këtë rast, presidentja Osmani e falënderoi ambasadorin Hovenier për angazhimin e tij të vazhdueshëm dhe vlerësoi lart punën e institucioneve në të dyja anët”, ka njoftuar Presidenca.
Presidentja Osmani dhe ambasadori Hovenier kanë diskutuar edhe për një sërë çështjesh të tjera të interesit të përbashkët dhe rikonfirmuar nevojën, gatishmërinë e bashkëpunimit dhe bashkrëndimit të vazhdueshëm, me qëllim të përmbushjes së objektivave të përbashkëta.