Një urim të pazakontë e ka pasur deputeti i AAK-së Pal Lekaj, drejtuar Qeverisë së Kosovës.
Në një status në Facebook, ai ka shkruar me shkronja të mëdha “QEVERI, ZOTI JU VRAFTË”.
Ky reagim i tij, ka ardhur pasi Kuvendi i Kosovës nuk e ka miratuar Projektligjin i cili do të mundësonte tërheqjen e 30% të kursimeve pensionale nga qytetarët.
Me 44 vota për, 57 kundër dhe vetëm një abstenim, projektligji për Trustin nuk i ka marrë votat e mjaftueshme për miratim në lexim të parë nga deputetët e Kuvendit të Kosovës.
Për këtë temë, u zhvillua debat i gjerë, me akuza e kundërakuza në mes të përfaqësuesve të pozitës dhe opozitës.
Kategorikisht kundër këtij projektligji është shfaqur kryeministri i Kosovës, Albin Kurti, i cili ka thënë se një veprim i tillë do ta dëmtonte të ardhmen e qytetarëve të Kosovës.
Ndërkaq, deputetët e opozitës, thirreshin në pasojat e krizës ekonomike që ka ndikuar në vend.
Sipas tyre, kërkesa për tërheqjen e mjeteve nga Trusti, është kërkesë e qytetarëve dhe jo e tyre.
Me kërkesë për miratim të projektligjit për Trust ishin mbajtur dy protesta para Kuvendit të Kosovës, ku kishin marrë pjesë qytetarë dhe pjesëtarë të partive politike opozitare.