Deputeti i Aleancës për Ardhmërinë e Kosovës(AAK), Pal Lekaj, ka dhënë detaje se pse lideri i AAK-së, Ramush Haradinaj, e ka lëshuar takimin me kryeministrin Albin Kurti.
Sipas tij, opozita nuk kishte qenë e ftuar nga kryeministri që të marrë pjesë në ndonjë plan të veprimit.
“Zotëri Kurti nuk e ka ftuar opozitën që të tregojë ndonjë plan të veprimit, t’i tregojë opsionet e veta sesi dilet nga zgjidhja, ka filluar të bisedojë për Podgoricën, Sarajevën, Shkupin dhe Beogradin, dhe kështu mendoj që ka qenë jo e pranueshme për zotëri Haradinajn”, ka thënë Lekaj.
Ai ka shtuar se një gjë e tillë, ka qenë fyese për Haradinajn, dhe sipas Lekaj, me të drejtë ai e ka lëshuar takimin.
“Ka qenë mjaft fyese për Haradinajn dhe me të drejtë e ka lëshuar takimin, dhe nëse një kryeministër e fton opozitën dhe sillet në atë mënyrë, mendoj që është e papranueshme jo vetëm për Haradinajn, por për gjithë spektrin politik”, ka shtuar Lekaj.
Tutje, Lekaj ka shtuar se pozicioni i AAK-së ka qenë mbështetës i favoreve që kanë qenë në favor të sigurisë së vendit. Madje, ai ka shtuar se edhe ftesave që Kryeministri i Kosovës i ka bërë, AAK-ja u është përgjigjur pozitivisht.
Ndërkaq, ai ka theksuar se në situata të tilla, nga të cilat, rrezikohet siguria e vendit “nuk guxojmë të sillemi sikur nuk ka ndodhur asgjë”.
“Për ne është e papranueshme dhe ne e kemi marrë seriozisht këtë gjendje sot, ndërsa në parlament jemi marrë me çështjen e energjisë, është dashur që sot Kryeministri në parlament t’i informojë deputetët e vendit për situatën në veri”, ka përfunduar Lekaj.
Sipas Lekaj, opozita gjendet në një terr informativ, gjersa në kushte të tilla sikur sot, ai ka thënë “një kryeministër i vendit të mos jetë serioz është e pakuptimtë”.