Gazetarja, Doruntina Bylykbashi ka njoftuar se pas më shumë se 5 orësh pritje është rregulluar sistemi kompjuterik nga Komisioni Qendror i Zgjedhjeve [KQZ] dhe se ka filluar verifikimi i votave për subjekte politike dhe numërimi i atyre të kandidatëve për deputetë në Qendrën Komunale të Numërimit të Votave në Prishtinë.
Bylykbashi në një lidhje direkte nga Qendra Komunale e Numërimit tha se procesi i numërimit të votave ka filluar gjatë ditës së martë, respektivisht pas orës 16:00.
“Aktualisht jemi në Qendrën Komunale të Numërimit të Votave në Prishtinë dhe pas më shumë se 5 orë ka filluar të punojë sistemi kompjuterik që menaxhohet nga KQZ-ja. Deri para pak minutash nuk ka filluar procesi i numërimit për shkaqe teknike. Ky proces ka nisur nga ora 16:00, në ditën e djeshme në 4 komuna Partesh, Lipjanin, Obiliqin dhe Prishtinën. Sepse në komuna të tjera nuk ishin të gatshëm për të filluar procesi i numërimit për shkaqe teknike”, njoftoi Bylykbashi.
Bylykbashi ka thënë se votat që po numërohen janë nga vendvotimet e rregullta, saktë 2533 dhe nga procesi i ditës së djeshme kanë arritur të numërohen vetëm 5 kuti të vendvotimeve.