Aktgjykimi i Gjykatës Kushtetues përcakton se përgjegjësia për konstituimin e Kuvendit të Kosovës u takon të gjithë deputetëve, e jo vetëm subjektit të parë politik, ka thënë kryetari i Lëvizjes Vetëvendosje dhe kryeministri në detyrë, Albin Kurti.
Përmes Facebookut, Kurti ka bërë të ditur se u është drejtuar të gjithë krerëve të subjekteve politike të përfaqësuara në legjislaturën e nëntë të Kuvendit me një ftesë për takim të përbashkët.
Takimi është paraparë të mbahet të shtunën, më 28 qershor, në orën 16:00.
“Aktgjykimi i djeshëm i Gjykatës Kushtetuese thekson qartë se obligimi për ta konstituuar Kuvendin është obligim i të gjithë deputetëve dhe jo vetëm i subjektit të parë. Si kryetar i Lëvizjes VETËVENDOSJE! dhe në emër të grupit më të madh parlamentar të dalur nga zgjedhjet e 9 shkurtit 2025, sot u jam drejtuar të gjithë krerëve të subjekteve të përfaqësuara në legjislaturën e nëntë, me ftesë për takim të përbashkët të shtunën (nesër) në orën 16:00, në përpjekje të radhës në funksion të konsensusit për konstituim të Kuvendit”, ka shkruar Kurti.