Pas vendimit të Qeverisë së Kosovës për uljen e pagave të gjykatësve dhe prokurorëve, Këshilli Gjyqësor i Kosovës (KGJK), do të mbajë të mërkurën një mbledhje të jashtëzakonshme duke filluar nga ora 16:00.
Qëllimi i kësaj mbledhjeje është diskutimi i situatës së krijuar pas vendimit të Qeverisë për pagat dhe hapat që KGJK-ja do të ndërmarrë në lidhje me këtë vendim, raporton “Betimi për Drejtësi”.
Ndryshe, në mëngjesin e së mërkurës, Qeveria e Kosovës ka vendosur t’i kthejë pagat e gjyqtarëve dhe prokurorëve, sikur para rritjes që ishte bërë me vendim të Qeverisë Haradinaj në vitin 2017.
“Kushti i paraparë për përjashtim të këtij ligji është plotësuar me nxjerrjen e aktgjykimit nga Gjykata Kushtetuese me ligjin e atëhershëm për paga, rrjedhimisht për të sjellë ligjshmëri plotësojmë këtë vendim duke shfuqizuar nenet relevante”, ka thënë Kurti.
Pas miratimit të Projektligjit për Pagat, shefi i ekzekutivit ka thënë se ky projektligj krijon sistem të unifikuar të pagave.
“Propozimi i sotëm i kushton rëndësi të madhe kualifikimeve. Askush nuk mund të paguhet më shumë sesa pesëfishi u pagës më të ulët në administratën tonë”, ka vijuar ai.