“Vetëm zvarritje, zvarritje, zvarritje”.
Kështu ka deklaruar kryeredaktori i Telegrafit, Muhamet Hajrullahu, në lidhje me rastin ku në orët e para të mëngjesit, dy persona kanë tentuar që ta blindojnë derën kryesore të hyrjes në objektin e komunës së Zveçanit, duke nisur saldimin e saj.
Në anën politike këtë qasje të Serbisë, Hajrullahu e ka cilësuar si vazhdimësi të tentimeve për të prolonguar procesin e betimit të kryetarëve të rinj në katër komunat veriore.
Në emisionin “Five”, Hajrullahu ka thënë se Serbia mundohet të jetë pjesë e dialogut, por në anën tjetër pengon dhe saboton punën e Kosovës drejt anëtarësimit në organizata ndërkombëtare.
“Ata kanë problem me veten e tyre, nuk e kam të qartë, Serbia tenton të jetë pjesë e dialogut, në anën tjetër lobon kundër Kosovës që të jetë pjesë e Këshillit të Evropës. Tenton t’i prolongojë e sabotojë proceset”, ka thënë Hajrullahu.
Sipas tij, është shumë e çuditshme qasja e Serbisë që ta fajësojë gjithmonë perëndimin edhe për problemet e brendshme.
“Vuçiqi ka probleme të brendshme, protestat qytetare, opozitare ka pasur dorëheqje të qeverisë, pikërisht duke fajësuar perëndimin për shkak të vlerave. Ajo që i ndodhi për vrasjet masive i la fajin perëndimit. Ai (Vuçiqi) tha kjo çfarë na ndodhi është për shkak të vlerave perëndimore. Është e çuditshme”, ka vijuar Hajrullahu.
Publikimi i draft-statutit për Asociacionin, Hajrullahu thotë se shihet qartë tendenca për ndërhyrje në punët e brendshme të shtetit të Kosovës
I pyetur për Asociacionin e Komunave me shumicë serbe, ka thënë se pjesë e ekipit për hartimin e draft – statutit tashmë të shkarkuar ka qenë pjesë dikush që është në parlament të Serbisë e që është konflikt interesi.
“Ky është konflikti i parë. Si mundet një deputete e Serbisë të draftojë një Asociacion, i cili do të menaxhojë jetën e serbëve në Kosovë”.
Sipas tij, kjo nuk i përfaqëson interesat e Kosovës.
“Unë i pashë reagimet pas publikimit të draft – statutit të Asociacionit, edhe atë të Abdixhikut që thotë shtet brenda shtetit. Nëse shërben ky si pikënisje, ka pika që mund të merren, por jo nga ato pika që e dobësojnë shtetin brenda për brenda”, ka theksuar ai.
Sipas tij, nëse do të ketë një Asociacion të tillë, pasojat do të jenë shumë të mëdha.