Igor Popoviq, ndihmësdrejtor i të ashtuquajturës “Zyrës për Kosovë në qeverinë serbe”, ka mbajtur sot një fjalim në Rahovec, gjatë të cilit ka përdorur gjuhë të ashpër kundër Ushtrisë Çlirimtare të Kosovës (UÇK), duke e cilësuar atë si organizatë terroriste dhe duke krahasuar veprimet e saj me ngjarje të rënda ndërkombëtare.
Me deklarimet e tij, ai ka nxitur urrejtje dhe përçarje ndëretnike në Kosovë.
“Vëllezërit tanë kanë pësuar sepse terroristët e UÇK-së nuk i donin serbët në këto hapësira, dhe me ekzekutimin e tyre donin të frikësonin popullatën tjetër serbe që ta braktiste këtë rajon”, ka deklaruar Popoviq, duke u ndalur tek viktimat serbe të luftës në Kosovë.
Ai ka shprehur pakënaqësi që sipas tij, autorët e krimeve ndaj serbëve nuk janë ndëshkuar asnjëherë.
“Dhemb edhe fakti që terroristët, organizatorët dhe ekzekutorët e krimit nuk janë gjetur dhe ndëshkuar gjatë gjithë këtyre viteve, megjithëse shohim që për një krim të ngjashëm – rrëmbimin e civilëve izraelitë – po shkatërrohet e gjithë Gaza”, ka thënë ai.
Në vazhdim, Popoviq ka akuzuar institucionet ndërkombëtare për dështim në hetime dhe drejtësi.
“Përkundër të gjitha grupeve ndërkombëtare të hetuesve të UNMIK-ut, EULEX-it dhe Tribunalit të Hagës, nuk ka të dënuar apo të ndëshkuar, përkundrazi, UÇK-ja vazhdon të cilësohet si organizatë çlirimtare dhe luftëtarë për liri”, ka thënë ai.