Komisioni Qendror i Zgjedhjeve ka përfunduar numërimin e të gjitha votave në Kosovë, ndërkohë që edhe 3 mijë e 185 pako me fletëvotime ende pritet të sillen në vend.
Sipas rezultateve të përditësuara të publikuara në faqen zyrtare të KQZ-së, Lëvizja Vetëvendosje kryeson me 51.01 për qind të votave, duke siguruar 57 ulëse në Kuvendin e Kosovës.
E dyta renditet Partia Demokratike e Kosovës me 20.24 për qind të votave dhe 22 ulëse parlamentare. Lidhja Demokratike e Kosovës ka marrë 13.26 për qind, duke siguruar 15 ulëse, ndërsa Aleanca për Ardhmërinë e Kosovës ka fituar 5.50 për qind të votave dhe 5 ulëse në Kuvend.
Zëdhënësi i KQZ-së, Valmir Elezi, ka bërë të ditur se ende nuk janë sjellë në Kosovë 3,185 pako me fletëvotime të votimit përmes postës, të cilat janë tërhequr më 2 dhe 5 janar nga kutitë postare në Paris (1,962), Berlin (633), Hagë (61), Podgoricë (125) dhe Otavë (404).
KQZ ka paralajmëruar se pas mbërritjes dhe numërimit të këtyre pakove, procesi do t’i afrohet fazës përfundimtare drejt certifikimit të rezultateve.