Sot janë bërë 25 vite nga Masakra mbi familjen Berisha në Suharekë, ku nga 49 të vrarë, trupat e 20 prej tyre ende nuk janë gjetur.
Kryetari i komunës së Suharekës, Bali Muharremaj dhe qytetarë të shumtë kanë bërë homazhe tek lapidari i mbi 500 viktimave civile të luftës. Homazhe janë bërë tek lokali ku janë masakruar anëtarët e familjes Berisha si dhe te memoriali i varrezave të Berishëve.
Kjo u bë e ditur nga Komuna e Suharekës përmes një postimi në rrjetin social “Facebook”.
“Kryetari i Komunës Bali Muharremaj, nënkryetarja Mihrije Suka, kryesuesi i Kuvendit Bexhet Kuqi, deputetë nga Suhareka në Parlamentin e Kosovës, përfaqsues të subjekteve politike, të Organizatave të dala nga lufta e UÇK-së dhe përsonalitete tjera kanë bërë homazhe dhe kanë vendosur buqeta me lule te lapidari i mbi 500 viktimave civile të luftës nga Komuna e Suharekës. Homazhe dhe vendosja e luleve u bë edhe te lokali ku janë vrarë e masakruar anëtarët e familjes Berisha, e po ashtu edhe te memoriali i varrezave të Berishëve”, thuhet më tej.