Fjala “luftë'” i është shtuar fjalorit të kryeministrit Albin Kurtit së fundmi, një javë pas tensioneve të 31 korrikut të veri të Kosovës.
Atë, Kurti e përmendi në deklarimet e tij të fundit për mediat vendore dhe ato të huaja.
Fillimisht tha se veriu rrezikohej nga një konflikt i armatosur nëse ai nuk do merrte vendim për shtyrjen e zbatimit të reciprocitetit.
Kurse, kur foli për zhvillimet në Ukrainë dhe ndikimin e Rusisë në Serbi shtoi se gjasat janë të larta që në Kosovë të nxitet një luftë.
Kjo gjuhë e përdorur nga kryeministri, sipas njohësit të fushës së komunikimit, Abit Hoxha, është e qëllimshme për disa arsye.
“Është njëfarë strategjie e komunikimit që të tërhiqet vëmendje pak më e madhe në dy rrafshe. Së pari në rrafshin e përkrahjes ndërkombëtare për Kosovën në situatën në të cilën gjendet dhe në rrafshin tjetër atë të dialogut me Serbinë dhe relacionet me Bashkimin Evropian, më saktësisht me përfaqësuesin special të BE-së, Z. Lajkçak”, ka thënë Hoxha.
Këtë diskurs, Kurti ka zgjedhur ta përdorë në kohën kur Kosova gjendet para dy momenteve që vlerësohen të rëndësishme.
Bëhet fjalë për takimin të 18 gushtit me Aleksandar Vuçiqin në Bruksel dhe nisjes së zbatimit të reciprocitetit me Serbinë më 1 shtator.
Për gjuhën e përdorur, Kurti kritikohet nga opozita.
Anëtari i Komisionit parlamentar për Siguri, Hisen Berisha, thotë se deklaratat e kryeministrit do të duhej të mbështeteshin në vlerësime të institucioneve të sigurisë.
“Në qoftëse këto deklarata të kryeministrit janë vetëm në nivelin e ngritjes së një alarmi jo të bazuar realisht në probabilitet, atëherë me siguri se do të penalizohen edhe në tavolinën e bisedimeve. Kjo do të jetë në dëm të Kosovës, por edhe vet kryeministrit dhe Qeverisë”, ka thënë Berisha.
‘Ndryshe nga Berisha, të drejtë i jep Kurtit bashkëpartiaku i tij Enver Dugolli, i cili udhëheq komisionin parlamentar.
“Kryeministri vetëm e ka konstatuar gjendjen për shkak se nuk ka thënë diçka që nuk mund të ndodhë. Marrë parasysh veprimet e organizuara të bandave kriminale të orkestruara nga Serbia, nga një shtet fqinj nënkupton se eskalimi deri në përmasa të një lufte të mudshme është potencial”, ka thënë Dugolli.
Tensionet në veri të vendit u ngritën natën e 31 korrikut, pak orë para se të hynte në fuqi reciprociteti me dokumente të identifikimit dhe targat ilegale të lëshuara nga Serbia.
Zbatimi i vendimit u shty nga Qeveria e Kosovës pas bllokimit të rrugëve nga serbët në veri dhe përdorimit të armëve kundër policisë.